ភ្នំពេញ៖ អ្នកនាំពាក្យក្រសួងយុត្តិធម៌លោក ជិន ម៉ាលីន បានឲ្យដឹងថាច្បាប់ព្រហ្មទណ្ឌ និងរដ្ឋប្បវេណី នឹងត្រូវធ្វើពិសោធនកម្មកែសម្រួលឡើងវិញដើម្បីស្របតាមបរិបទសង្គមនាពេលបច្ចុប្បន្ន។

ការធ្វើវិសោធនកម្មនេះគឺបន្ទាប់ពីមហាសន្និបាតជាលើកដំបូងក្នុងប្រវត្តិសាស្ត្រនៃព្រះរាជាណាចក្រកម្ពុជារវាងក្រសួងយុត្តិធម៌ និងស្ថាប័នតុលាការដែលរៀបចំរយៈពេលបីថ្ងៃពីថ្ងៃទី២៧ ដល់ថ្ងៃទី២៩ ខែមីនានៅសណ្ឋាគារហ្គាឌិនស៉ីធី ភ្នំពេញ។

ក្រមចំនួន៤ ដែលនឹងធ្វើវិសោធនកម្មនេះរួមមានក្រមព្រហ្មទណ្ឌ ក្រមនីតិវិធីព្រហ្មទណ្ឌ ក្រមរដ្ឋប្បវេណី និងក្រមនីតិវិធីរដ្ឋប្បវេណី។

ការសើរើច្បាប់ទាំងនេះគឺដោយសារតែមានការពិបាកក្នុងការប្រើប្រាស់ពាក្យដែលមានភាពស្មុគស្មាញ ការលំបាកក្នុងការចេញដីកា និងភាពលំបាកក្នុងនីតិវិធីមួយចំនួនក្នុងក្រមទាំង៤ខាងលើ។

ជាងនេះទៅទៀតក៏ទាក់ទងជាមួយនឹងការជូនដំណឹងនិងការវិវត្តតាមសម័យកាលឌីជីថលនាពេលបច្ចុប្បន្នផងដែរ។

បើតាមលោក ជិន ម៉ាលីន គម្រោងក្នុងការធ្វើពិសោធនកម្មនេះនឹងអាចចាប់ផ្ដើមនៅឆ្នាំ២០២៤ នេះ៕